Традыцыі з маміных рук: сапраўдная сямейная бабка ад Ніны Аляксееўны
У межах акцыі «Кожная пятніца - роднае, сваё!» наша рубрыка «Кулінарная пятніца» працягвае знаёміць вас з найлепшымі стравамі беларускай кухні.
Ёсць дакументы, якія засведчваюць права ўласнасці, і ёсць рэцэпты, якія засведчваюць любоў.
Здавалася б, чым яшчэ можна здзівіць у рэцэпце класічнай картафлянай бабкі? Але па нашым меркаванні: аднолькавых бабак не існуе! Бабка — гэта не проста цертая бульба з салам, гэта працяг сямейных традыцый, хатняя ўтульнасць і асаблівая маміна любоў.
У Дзень маці натарыус Таццяна Смірнова завітала ў госці да сваёй матулі Ніны Аляксееўны. А якое ж свята ў мамы без духмяных частаванняў? Галоўным пачастункам сустрэчы стала сапраўдная хатняя бабка, запечаная ў гліняных гаршчэчках.
Бабка атрымалася такой апетытнай і духмянай, што Таццяна Аляксандраўна проста мусіла пачаставаць ёй калег! У натарыяльнай канторы № 3 Чыгуначнага раёна Гомеля бабку сустрэлі з захапленнем: гаршчочкі апусцелі літаральна за хвіліны. Пра смак стравы калегі кажуць аднадушна, і лепшага пацвярджэння, чым пустыя гаршчочкі, не патрэбна.
З дазволу Ніны Аляксееўны з задавальненнем дзелімся яе правераным сямейным рэцэптам.Сакрэт духмянай бабкі ад матулі
Інгрэдыенты:
Бульба — 1,5–2 кг (крыху больш, чым на два гаршчэчкі);
Цыбуля — 4–5 сярэдніх штукі;
Сала — 200 гр.;
Мука — 2 ст. лыжкі;
Смятана — 2 ст. лыжкі (а таксама для падачы);
Раслінны алей або вяршковае масла (каб памасціць гаршчэчкі)
На вока і на густ: соль, чорны перац.
Кулінарныя крокі:
1. Падрыхтоўка асновы: Ачысціць бульбу і нацерці яе на дробную тарку (або скарыстацца кухонным камбайнам).
2. Зажарка: Дробна нарэзаць цыбулю і сала. Абсмажыць на патэльні да залацістага колеру цыбулі.
3. Злучэнне інгрыдыэнтаў: Даць засмажцы крыху астыць, потым змяшаць яе з нацёртай бульбай. Дадаць солі, перцу, 2 сталовыя лыжкі мукі і 2 сталовыя лыжкі смятаны. Усё добра перамяшаць.
4. Запяканне: Керамічныя гаршчочкі змазаць знутры алеем або вяршковым маслам. Атрыманую масу выкласці ў гаршчочкі, не напаўняючы іх да самага верху.
5. У духоўцы: Паставіць гаршчочкі ў загадзя разагрэтую духоўку на гадзіну — гадзіну 15 хвілін (у залежнасці ад аб'ёму гаршчочкаў).
